Mwenyekiti wa CCM Taifa, Rais Jakaya kikwete akizungumza
Ndugu Walid Amani Kaburu, Mwenyekiti wa CCM wa Mkoa wa Kigoma;
Ndugu Philip Mangula, Makamu Mwenyekiti wa CCM Bara;
Mwenyekiti wa CNDD;
Katibu Mkuu wa PPRD;
Ndugu Abdulrahman Kinana, Katibu Mkuu wa CCM;
Ndugu Wajumbe wa Halmashauri Kuu ya Taifa mliopo;
Ndugu Wajumbe wa Sekretarieti ya Halmashauri Kuu ya Taifa;
Watendaji Wakuu wa Serikali na Viongozi wa CCM wa ngazi mbalimbali;
Wanachama wenzangu wa CCM;
Wageni waalikwa;
Mabibi na Mabwana;
Awali ya yote niruhusuni nianze kwa kuwashukuru viongozi, wana-CCM na wakazi wa Kigoma kwa mapokezi
mazuri sana mliyonipa mimi na mke wangu Salma MNEC wa Lindi Mjini tangu tulipowasili mkoani hapa. Nawapongeza kwa kukubali kuwa wenyeji wa Sherehe za Kuadhimisha Miaka 36 ya Kuzaliwa kwa Chama cha Mapinduzi. Lakini pongezi kubwa kwa kuandaa sherehe hii kwa mafanikio makubwa. Utaratibu mpya wa Katibu Mkuu na Wajumbe wa Sekretariet kutembelea matawi, kuzungumza na wanachama na wananchi ni wa aina yake. Ni mzuri na unafaa kuigwa.
Ni jambo la faraja na kujivunia kwamba tunasherehekea Chama chetu kufikisha umri wa miaka 36 wakati kikiwa imara na nguvu za kutosha za kupambana na kushinda katika mfumo wa vyama vingi uliodumu kwa miongo miwili. Pia kwamba, nchi yetu na watu wake bado ni wamoja, na kuna amani na utulivu licha ya kuwepo kwa changamoto ndogo na kubwa zinazotishia umoja na mshikamano wetu. Ni jambo la kufurahisha na kutia moyo kwamba tunasherehekea miaka 36 ya Uhai wa CCM wakati nchi ya Tanzania ikiendelea kupiga hatua kwa kasi katika kujiletea maendeleo. Tena maendeleo yaliyo dhahiri na yanayoonekana na wote isipokuwa, labda, wale ambao hutembea wakiwa wamefumba macho.
